www.mizorampeopleforum.org

  • Increase font size
  • Default font size
  • Decrease font size
Welcome to the Official Website of Mizoram People Forum

Working Guideline

E-mail Print PDF

MPF  TOBUL
Mizorama Politics boruak inlumleh dan leh a than danglam zel dan te, chumi huang chhunga ram inrelbawlna hmelhmang lo danglam chhoh zel dante hi ram pum huapin mite ngaihven ber a ni lo thei lo va. Mizoram Presbyterian Church Synod chuan politics siamthat hna chu chak zawka thawh ni se, SEC-in lo bawhzui rawh se tiin a rel a (Synod 2004 Gen.11). SEC chuan Synod thurel chu bawhzuiin Kohhran hrang hrangin mahni tawk theuhva beih ai chuan intel khawma, awmze nei zawka thawh tul a ti a. Kohhran leh Tlawmngai Pawl hrang hrangte ram siamthatna kawnga an thawhho dan tur ruahmanna siamtu tur mi a ruat ta bawk a ni.

Kohhran leh Pawl hrang hrangte chu Politics siam tha tura thawhhona kawng zawngin vawi tam tak an inrawn khawm a. Chu thawhhona tur Pawl, ruahmanna siamtu ten an rawn siam chu pawmin, a hmingah “Mizoram People Forum” tih chu pawm a ni a. A kalphung leh inrelbawl dan tur te, Mizoram hmun tina a indin chhoh dan tur, ruangam te uluk taka duan fel anih hnuah, Kohhran leh Tlawmngai Pawl hrang hrang aiawh kalkhawmte chuan June 21, 2006 (Thawhtanni) khan lungrual takin Mizoram People Forum hi a lo din ta a ni.

Kohhran Pawl hrang hrang leh Tlawmngai Pawlte din anih ang ngeiin MPF chu Politics siamtha tura Mizorama mi zawng zawng thawhhona Pawl a ni.


MPF NIHPHUNG
1.     Mizoram-a mipui huap, thlei bik nei lo, rilru thianghlim leh dik tak pua Politics siamthat duhtu zawng zawngte tana Pawl ding a ni. Party politics-a tel te tan thuk takin MPF atanga hmalak a remchang lo.

2.    Kohhran Pawl hrang hrang leh Tlawmngai Pawlte, Mizoram politics siam tha tura intelkhawmna a ni. Kan rama harsatna hrang hrang te, hlemhletna, retheihna leh buaina tam tak siamthatna bul chu ram rorelna tha leh dik neih a ni. Chumi atan chuan inthlanna thianghlim, dik leh felfai neih a ni a. Chutiang tak chu kan ramah a awm ngei theihna turin theihtawp chhuah turin Kohhran Pawl hrang hrang leh Tlawmngai Pawlte beisei an ni.

3.    Politics siamthat chu a din chhan a nih avangin Mizoram Politics tha lo lai apiang siam tha turin hna a thawk ang. Chumi rual chuan a tha leh duhawm laite chawisangin, ram leh hnam in hma a sawn zel theihna turin a bei ang.

4.    Sawrkar dona leh ep tura MPF hi ding a ni lo va, sawrkar tha a awm theih nan thurawn pein thawhpui a tum zawk a ni. Mizoram ah political party hrang hrang ten zalen tak leh dik taka politics an khelh theihna tura boruak tha leh muanawm siam hi MPF tum ber pakhat a ni.

5.    Thurawn thate dawngsawng tur leh bawhzui turin a inhawng reng a ni. Tumah thlei bik nei lovin hma a la ang a.

6.    Politics tha lo leh corruption chungchangah a inkhing zawng ni lovin, a kalphung tha siam turin hma a la ang a, sawrkar khalh ngil leh mipuite zirtir hna a thawk ang.

7.    Politics siamtha tura Pawl ding a nih angin, member-te chu MPF thil tum leh hmalaknaa chiang tak, helama tui mi leh tangkai  ni tura beisei an ni.



MPF THILTUM
1.     Politics dik leh tha a awm theih nan.

2.    India Constitution, Election Laws leh Code of Conduct-in a duh ang taka mipui rorelna sorkar siam tura inthlanna zalen leh thianghlim a awm theih nan.

3.    Inthlanna zalen leh dik tak a lo awm theih nan tharum thawh, invau, inrikrapna leh sum leh pai hmanga vote lei tireh turin.

4.    Mizoram mipui ten hmasawnna kawng dik taka an zawh theihna tura policy tha zawn chhuah, ruahmanna tha tak siam leh mipui zirtir

5.    Dikna leh hmasawnna tha tak a lo awm theih nan atul dan ang zela sorkar nena indawr, policy chungchang leh ram kalphung sawiho, siamthat leh sorkar thawhpui.

6.    Mizoram ah rorelna tha leh dik a lo awm theih nan a remchan dan ang zela sorkar hna kalphung enpui leh siamthat tul laite siamtha tura sorkar hnathawkte tanpui.

7.    Mizoram mitinte khua leh tui tha kan nih theihna tura rinawmna, dikna leh taimakna zirtir.

8.    Mipuiten an hriat tur an lo hriata, an chan tur dik tak an chan a, zahawm leh hlim taka an khawsak theih nan.

HMA LAK DAN TUR
1.    MPF hi inthlanna chuh a, electoral politics luhchilh zawngin a kal dawn lo va, inthlanna chi hrang hrang- MP, MLA, MDC leh VC thlannaah, inthlanna felfai leh thianghlim a awm theihna turin theihtawp a chhuah ang.

2.    Political Party mal bik hamthatna tur leh chhiatna tur zawngin hna a thawk lo vang.

3.    Mizoram  mipui  ten   hmasawnna kawng dik taka an zawh theihna tura policy tha zawn chhuah, ruahmanna tha tak siam leh mipui zirtir kawngah hma a la ang.

4.    Mizoram ah rorelna tha leh dik a lo awm theih nan sorkar hna kalphung enpui  leh siamthat tul laite siamtha tura sorkar hnathawkte tanpui turin hma a la ang.

5.    Mizoram mitinte khua leh tui tha kan nih theihna tura rinawmna, dikna leh taimakna zirtir turin hna a thawk ang.

6.    Mipuiten an hriat tur an lo hriata, an chan tur dik tak an chan a, zahawm leh hlim taka an khawsak theih nan theihtawp a chhuah ang.


FORUM HRANG HRANG TE TIH TUR

CENTRAL FORUM
Central Forum hi General Body dawta thuneitu sang ber a ni a, Governing Board tih a ni nghal bawk ang. Central Forum hian Pawl thiltum a lo hlawhtlin theih nan policy mumal tak a siam ang a, a aiawha Pawl lo enkawl tura ruat Board Executive Committee kaltlangin heng mawhphurhna te hlenchhuak tur hian theihtawp a chhuah thin ang.

1. MPF dinchhan leh thiltumte tihlawhtling tura fehchhuak tur – Trainers leh Campaigners-te zirtirna tur, Training of Trainers a buatsaih thin ang.

2. Forum hrang hranga semdarh turin mipuite zirtirna tur – leaflet, seminar paper,   Election model code of conduct leh tul dangte a buatsaih thin ang.

3. Mizoram hmun hrang hrangah awareness campaign leh seminar buatsaihin, ruahmanna a siam thin ang.

4. Media hrang hrang – TV (DD & Cable), Radio leh Chanchinbu hmangin zirtirna a thehdarh thin ang.

5. A tul dan a zirin sorkar, ministry leh Political party hruaitute a kawmin, ram leh hnam tana hmalakna turte a duang thin ang.

6. Inthlan dawnah Political Party-te leh Candidate-te kawmin, Inthlanna thianghlim, dik leh felfai taka kalpui a nih theihna turin ruahmanna a siampui thin ang a; Election Department nen thawhho dan tur a ngaihtuah bawk ang.

7. Mizoram hmun hrang hranga District leh Local Forum-te tha tichak turin theihtawp a chhuah thin ang.

8. MPF dinchhan leh thiltumte tihlawhtling turin hmalakna tul leh tangkai nia a hriatte a ti thin ang.


DISTRICT FORUM
1.    Mizoram Administrative/Political District tina  ‘MPF District Forum’te chuan Central Forum hmalakna zulzuiin, anmahni huamchhungah chak takin hma an la ang.

2.    An hmalakna tichak turin, a tul dan azirin Committee peng hrang hrang a siam thei ang.

3.    An huamchhung District-a Forum hruaitute pualin Seminar leh Training a buatsaih ang.

4.    An huam chhung District-a Local Forum-te hmalak dan enpuiin thurawn a pe thin ang.
5.    A hnathawh dan Central Forum-ah a report thin ang.



CONSTITUENCY FORUM
1.    Inthlanpui hmachhawn dawn leh tulbik thilah chuan Assembly Constituency zulzuiin, Pawl thiltum tihlawhtling turin ‘Constituency Forum’ din a ni ang.

2.    Constituency Forum chuan an huam chhunga Local Forum-te hnathawh dan tur a relpuiin, ruahmanna tha a ngaihtuahpui ang.

3.    Constituency Forum huam chhunga Local Forum Office Bearer-te chu Constituency Forum ah hian Executive Committee member nisa an ni ang.

4.    Constituency Forum huam chhungah rualkhai taka Election Campaign kalpui anih theih nan leh mumal taka Political Party leh candidate-te tana Joint Platform buatsaih anih theihna turin hma
a la ang.

5. Constituency Forum huam chhunga Local Forum, harsatna bik nei an awm chuan a enpui thin ang.

 


LOCAL FORUM
1. Central Forum leh District Forum din dan zulzuiin veng / khua, VC pakhat awp chhunga  Pawl thiltum tihlawhtling turin ‘Local Forum’ Pakhat emaw a aia tam emaw din a ni.

2. Mizoram ah rorelna dik leh tha a awm theihna tur te, Inthlanna thianghlim, dik leh felfai taka kalpui a nih theihna turin zirtir hna a thawk thin ang.

3. A huam chhunga political party hotute nen inberawnin inthlanna dik leh felfai a awm theih nan hma an la ho ang.

4. An huam chhung mipuite pualin Seminar leh Training a buatsaih ang.

5. Mipuite chu Party ruihchilh lo tur leh Politics tuinu atanga inthiarfihlim turin a zirtirin, a fuih thin ang.

6. Mipui a tam thei ang ber, Party awn lam nei lo, neutral taka an awm theihna turin leh chhia leh tha hriatna fim tak hmang thei turin a zirtir thin ang.

7. Hetiang atan hian veng chhung chanchinbu leh tlangauna (PA Set) te hmang tangkai turin hma a la ang.

8. Inthlan dawn bikah chuan a hnuaia tarlanah te hian theihtawpin hma a la ang.
1)    House to house campaign awm lo turin
·    Sum leh therhlo dang sem emaw, inthlanna senso tisang thei tur hmalakna tireh turin
·    Mipui, Pawl hrang hrang leh Kohhrante pawhin candidate-te hnenah thil phut nei lo turin leh intiamkamna engmah siam tir lo turin
·    Uchuak taka inchirhthehna lam hawi thusawi a awm lohna turin
·    Inrikrapna leh tharum thawhna lam hawia campaign a awm lohna turin
·    Ruai siam te, kawngzawh vak vak te, poster leh banner uchuak taka tarte awm lo turin
ix)    Party manifesto leh thil tul dangte sem tur a awm a nih chuan Party mal malin sem lovin, MPF Local Forum kutah dahin, Forum memberten In tina a ruala an sem dan kawng dap ni se.

x)    Political Party hrang hrang leh Candidate-ten a hran theuha vantlang inkhawm buatsaih lovin, MPF Local Forum kaihhruaina hnuaiah Joint Platform buatsaih thin tura hmalak a ni ang a. Hemi bak party malin public meeting neih an duh chuan MPF Local Forum kaihhruaina a kalpui tura hma lak ni se.

xi)    Inthlan nia electoral roll en leh thingpui lum pawh hi MPF Local Forum kaihhruaina hnuaiah buatsaih ni thei se.

xii)    A chunga tihtur leh hmalakna tur hrang hrangte tipuitling tur hian MPF Constitutuent members – YMA, MHIP, MUP, YLA, MTP, YCA leh Kohhran hrang hrangte hman tangkai thiam ni se.

xiii)    MPF Local Forum hnathawh dan chu District Forum-ah a report thin ang.

Last Updated on Tuesday, 08 March 2016 08:54
 

He ramah hian awm la, rinawmna um zel rawh. (Trust in the Lord, and do good; dwell in the land, and follow after faithfulness) Sam 37:3.

 

MPF hi rorêlna tha leh dik a lo awm a, remna leh muanna (peace and harmony), hmasáwnna chak, kâirual leh tha (progressive, just and sustainable socio-economic development) leh mipúi zalênna (freedom) a lo awm theihna túra Kohhran leh Tlâwmngai Pâwlte thawhho theih nâna dín a ni a. June 21, 2006 khan he Pawl hi din a ni.

 

(The MPF was setup by the churches of Mizoram and the different NGO’s so that there can be good and fair governance, peace and harmony, progressive, just and sustainable socio-economic development and freedom for the people of Mizoram. It was started in 21st June, 2006).

 

 


 

feed-image Feed Entries Our site is valid CSS Our site is valid XHTML 1.0 Transitional